2024թ-ի հունվարի-մարտ ամսիների ընթացքում «Նոր Սերունդ» Մարդասիրական ՀԿ-ն (ՆՍՀԿ) շահառուներից ստացել է մի քանի ահազանգեր այն մասին, որ ՀՀ Ազգային անվտանգության ծառայության (ԱԱԾ)-ի կողմից ծանուցումներ են ստացել այն մասին, որ նախաձեռնվել են քրեական վարույթներ պարտադիր զինվորական ծառայությունից նույնասեռականության հիմքով ազատվելու մասով։ Վերջիններս զինվորական ծառայությունից ազատվել են 2021-2022թթ-երի ընթացքում։ 

ԱԱԾ-ից գործերը տեղափոխվել են համապատասխան քննչական բաժիններ, որտեղ և շարունակվում են գործերի քննությունները։ 

Ստացված ահազանգերով անձինք հայտնել են, որ քննիչների կողմից ուղեգրվել են հոգեկան առողջության կենտրոններ կրկնակի հետազոտություն անցնելու նպատակով։ 

 Հարուցված վարույթները ՆՍՀԿ-ի աջակցությամբ կարճվել են։  

«Նոր Սերունդ» Մարդասիրական ՀԿ-ն իր մտագոհություն է հայտնում իրավապահ մարմինների անօրինական գործողությունների վերաբերյալ և հորդորում  գործել բացառապես ՀՀ օրենքներին համապատասխան։ 

Պարզաբանում․ 

ՀՀ Կառավարության  2018 թվականի ապրիլի 12-ի N 404-Ն որոշման հոդված 8․  

Ներառում է անձի և վարքի, ներառյալ` անձի յուրահատուկ և խառը խանգարումները, սովորույթների և հակումների, սեռական նույնացման, սեռական նախընտրության, սեռական զարգացման և կողմնորոշման հետ կապված հոգեբանական և վարքային խանգարումները, արտահայտված և կոմպենսացիայի չենթարկվող ձևերը, անձի` հաճախակի դեկոմպենսացիաներով խանգարումները, ինչպես նաև կրկնվող իրավիճակային և անձնային ռեակցիաները, որոնց հաճախականությունը 1 տարվա ընթացքում 3 անգամ և ավելի է: 

Տվյալ դեպքում անձը ոչ պիտանի է պարտադիր զինվորական ծառայության համար։ 

2023թ-ի հունիսի 1-ի փոփոխություններով․ 

Ներառում է արտահայտված, կոմպենսացիայի չենթարկվող հասուն անձի և մեծահասակի վարքային խանգարումները, դեկոմպենսացիաներով կամ կոմպենսացված անձի խանգարումները։ Այս հոդվածով են փորձաքննվում նաև սեռական նույնացման, նախընտրության, զարգացման և կողմնորոշման հետ կապված հոգեբանական և վարքային խանգարումների գերակշիռ մեծամասնությունը։ 

Սեռական կողմնորոշման այն ձևերը, որոնք չեն հանդիսանում հոգեբանական և վարքային խանգարումներ կամ չեն զուգակցվում դրանցով, խոչընդոտ չեն զինվորական ծառայության համար։