ՀԱՄԱԳՈՐԾԱԿՑՈՒԹՅԱՆ ՀԵՐԹԱԿԱՆ ՀԱՋՈՂՎԱԾ ՓՈՐՁԸ
2022 թվականի հուվարին 27 «Նոր Սերունդ» Մարդասիական ՀԿ են դիմել օտարերկրացիներ Տ․Մ․-ն (անունը փոխված է), Դ․Հ․-ն (անունը փոխված է) և Ա․Շ․-ն (անունը փոխված է), որոնց մոտ լնդային տրանսուդատի հետազոտման արդյունքում հայտնաբերվել է ՄԻԱՎ դրական։ Անձինք ուղղորդվել են ՀՀ ԱՆ «Ինֆեկցիոն հետազոտությունների ազգային կենտրոն» ՓԲԸ՝ հետագա հետազոտությունների, ՄԻԱՎ-ի հայտնաբերման դեպքում դիսպանսերայի հսկողության անցնելու և բուժում ստանալու նպատակով, սակայն շահառուներին դեղորայք չի տրամադրվել՝ ՀՀ կացության քարտ չունենալու հանգամանքով պայմանավորած։
«Նոր Սերունդ» Մարդասիրական ՀԿ-ն գրությամբ դիմել է ՀՀ առողջապահության նախարարություն և «Ինֆեկցիոն հետազոտությունների ազգային կենտրոն» ՓԲԸ՝ խնդրելով պետության կողմից երաշխավորված անվճար և արտոնյալ պայմաններով տրամադրել բժշկական օգնություն և սպասարկում։
Համագործակցության արդյունքում անձինք ընդգրկվել են բուժման և խնամքի ծառայություններում։
«Նոր Սերունդ» Մարդասիրական ՀԿ-ն շնորհակալություն է հայտնում ՀՀ Առողջապահության նախարարությանը և «Ինֆեկցիոն հիվանդությունների ազգային կենտրոն» ՓԲԸ-ին արդյունավետ համագործակցության համար:
Պարզաբանում․
- «Մարդու իմունային անբավարարության վիրուսից առաջացած հիվանդության կանխարգելման մասին» ՀՀ օրենքի հոդված 3․
Օրենքը տարածվում է Հայաստանի Հանրապետության քաղաքացիների, Հայաստանի Հանրապետության տարածքում գտնվող օտարերկրյա քաղաքացիների և քաղաքացիություն չունեցող անձանց (այսուհետև` անձինք), ինչպես նաև Հայաստանի Հանրապետության տարածքում գործող ձեռնարկությունների, հիմնարկների և կազմակերպությունների (անկախ սեփականության ձևից) վրա։
- ՀՀ առողջապահության նախարարի 22.11.2013 թվականի «Պետության կողմից երաշխավորված անվճար բժշկական օգնության եւ սպասարկման շրջանակներում ՄԻԱՎ/ՁԻԱՀ-ի կանխարգելման եւ բուժման կազմակերպման չափորոշիչը հաստատելու մասին» № 75-Ն որոշման 13-րդ կետ․
ՀՌՎ բուժումն անվճար է և տրամադրվում է ցուցում ունեցող բոլոր հիվանդներին, որոնք տվել են իրենց համաձայնությունը բուժման վերաբերյալ համապատասխան տեղեկատվություն ստանալուց հետո: