Հայ երիտասարդները Գերմանիայում՝ ստեղծագործական ճամբարում

2025թ․-ի Հուլիս 17-ից 27-ը «Նոր Սերունդ» Մարդասիրական ՀԿ-ի աջակցությամբ Հայաստանից 12 երիտասարդներ մասնակցեցին Գերմանիայի Բահրետալ քաղաքում կազմակերպված միջազգային ամառային ճամբարին։

 

Ճամբարը նախաձեռնվել էր «JunOst» երիտասարդական կազմակերպության կողմից և միավորել էր մի շարք երկրների ներկայացուցիչների՝ նպատակ ունենալով խթանել միջմշակութային փոխանակումը, ստեղծագործական մտածողությունը և անձնական զարգացումը։ Ճամբարի հիմնական թեմաներն էին երիտասարդների ինքնաճանաչումը, սեփական ուժեղ կողմերի բացահայտումն ու զարգացումը՝ ստեղծագործական աշխատանքի միջոցով։

Այս ծրագիրը հատկապես ուղղված էր երիտասարդ ստեղծագործողներին՝ արվեստի տարբեր ճյուղերում իրենց հմտությունները զարգացնելու և միջազգային շփումների միջոցով նոր գաղափարներ ձեռք բերելու նպատակով։ Մասնակիցները ակտիվ ներգրավվածություն են ունեցել ծրագրի բոլոր բաղադրիչներում։

Նրանք համագործակցել են տարբեր երկրների երիտասարդների հետ՝ կիսվելով փորձով, մասնակցելով քննարկումների, թիմային աշխատանքների, ինտերակտիվ վարժանքների և մշակութային ներկայացումների։ Հայաստանի թիմի անդամները հանդես են եկել հայկական մշակույթի տարբեր ներկայացումներով։ Ոմանք մասնակցել են ազգագրական պարերի և երգերի ցուցադրությանը, իսկ մյուսները ներկայացրել են հայ նկարիչների, մասնավորապես Մարտիրոս Սարյանի արվեստը՝ ժամանակակից մեկնաբանություններով ստեղծված աշխատանքների միջոցով։

Բոլոր մասնակիցների համար սա առաջին այցն էր եվրոպական քաղաք, և նրանց տպավորությունները բացառիկ էին։ Նրանց խոսքով՝ եվրոպական արժեքների հետ անմիջական շփումը, կազմակերպվածությունն ու բազմազանությունը բացել են նոր հեռանկարներ և ինքնազարգացման ուղիներ։ Ճամբարի մասնակիցների համար ծրագրի իրականացումը հնարավոր դարձավ «Նոր Սերունդ» Մարդասիրական ՀԿ-ի երկարամյա համագործակցության շնորհիվ, որն արդեն տասնյակ տարիներ իրականացնում է երիտասարդական փոխանակման ծրագրեր՝ համագործակցելով Գերմանիայի և այլ երկրների մի շարք կազմակերպությունների հետ։

Հայաստանյան խմբի ղեկավար Լևոն Չիլինգարյանը ճամբարին մասնակցում էր նաև որպես դասընթացավար և ջոկատավար։ Նրա խոսքերով՝ նման ձևաչափերը կարևոր հարթակ են երիտասարդների զարգացման և ինքնադրսևորման համար։ «Գալիք տարում պլանավորում ենք իրականացնել երկու նոր փոխանակման ծրագիր հայաստանաբնակ երիտասարդների համար, որտեղ նրանք կրկին կստանան միջազգային հարթակում ներգրավվելու հնարավորություն»,- նշել է Լևոն Չիլինգարյանը։